ජනිත් ගේ විකාර කතා .

මම දැන් පාවිචිචි කරන ලැප මම මිලදී ගත්තේ 2016 අවුරුද්දේ අග. මේක ගන්නකොට උනත් මේක වෙලඳපොලේ තිබ්බ හොඳම එක නොවුනත් ජීවිතේට මුලින්ම ගත්ත ලැප් එකත් මේකම නිසා පොඩි සෙන්ටිමෙන්ටල් වටිනාකමකුත් මේකේ මට තියනවා. කොහොමහරි මේක ගන්න හේතු උනේ ඒ වෙනකොට ඉවර කරමින් තිබ්බ එම්.ෆිල් එකේ තීසීස් එක, එහෙමත් නැත්තන් පර්යේශන නිබන්ධනය ලියන එක. වින්ඩෝස් 7 මෙහෙයුම් පද්ධතියත් එක්ක, Core I3 ප්‍රොසෙසරයක් සහ 4Gb RAM එකක් එක්ක පිටු  150ක විතර වර්ඩ් ගොනුවක් ලියන ගමන් ඊට සමාන්තරව PDF ෆයිල් කිහිපයක් සහ වෙබ් බ්‍රව්සරය දුවන එක මේ කොම්පියුටරේට ලොකු අමාරුවක් උනේ නෑ.

ඊට අවුරුදු 5ක් ගෙවෙන තැන ආයෙමත් ලැපක් ගන්නවද නැද්ද කියන අවශ්‍යතාවය එන්නේ PhD ප්‍රසන්ටේශන් එක කරන්න ගියාම. කැම්පස් එකෙන් වැඩ කරගන්න දුන්න අලුත්ම Core I7 16Gb RAM ඩෙස්ක්ටොප් එකෙන් තීසිස් එක ලියලා ඉවර කරාට ඒක උස්සගෙන ප්‍රසන්ටේශන් කරන්න යන්න බෑ නේ. මේ වෙනකොට Laptop එකේ මෙහෙයුම් පද්ධතිය වින්ඩෝස් 10 ට පරිණාමය වෙලා තිබුන නිසා ඒක වැඩ කරේ ගොලුබෙලි ගමනින්. ප්‍රසන්ටේශන් එක කරන්න අඩුම zoom ඇප් එකයි, පවර්පොයින්ට් එකයි, බ්‍රව්සරෙයි, හදිසියක් උනොත් කියලා නෝට් පෑඩ් එකයි එකවිට දුවා ගන්න ඕන. ඒත් මේකේ වින්ඩෝස් ලෝඩ් වෙන්නම විනාඩි 10 විතර යනවා. පැය බාගෙකින් විතර ඔය ඔක්කොම අමාරුවෙන් රන් කරගත්තත් ප්‍රසන්ටේශන් එක අතරමග මේක වලකජ්ජ ගහන්නත් ඉඩ තියන නිසා මොකද කරන්නේ කියන දෙගෙඩියාවෙන් තමයි හිටියෙ. අලුත් ලැපක් ගත්තත් අඩුම ඩොලර් 1000 වත් යනවා (Core I7, 16Gb RAM). ප්‍රසන්ටේශන් එකකට වෙනම එච්චර වියදම් කරන්නත් නිකන් මොකද වගේ.

ඒ පාර තමයි හිතුනේ මේකට පොඩි අප්ග්‍රේඩ් එකක් වත් දීලා බලන්න ඕන කියලා. වොරන්ටි පැනලා සෑහෙන කලක් නිසා ඕන මගුලක් කියලා සීල් කඩලා බලද්දී අමතර RAM ස්ලොට් එකකුත් තියනවා. ඩෙල් වෙබ්සයිට් එකට ගිහින් බලනකොට තිබ්බා 8 Gb වෙනකන් RAM මේකට සපෝට් කියලා. E bay එකේ බලද්දී රැම තියනවා ඩොලර් 28ට . දැම්මා ඕඩරයක් රැමකට එවෙලේම. ඊලඟට බැලුවේ හාඩ් ඩිස්ක් එක SSD වලට මාරු කරන්න. ඒක ඊ බේ එකට වඩා ලාබෙට යූ මාට් එකේ තිබ්බා ඩොලර් 64ට. එවේලෙම දැම්මා ඒකටත් ඕඩරේ.

සති දෙක යන්න කලින් රැම ගෙදරටම ආවා. හාඩ් එක නම් ඕඩර් කරපු දවසෙම ගත්තා. දෙකම හයි කරලා පොඩි ලුක් එකක් එන්න කියලා ලැබ් එකට අරන් ගිහින් බ්ලෝවර් කරලා එතනෝල් වලින් හෝදලා ගත්තා. සිස්ටම් ආයෙත් දාලා බලනකොට ස්පීඩ් එක ආය කියලා වැඩක් නෑ. වින්ඩෝස් ලෝඩ් වෙනවා තත්පර 10ට අඩුවෙන්. ඉස්සර වගේ ප්‍රෝග්‍රෑම් දෙකතුනක් දුවද්දී ස්ටක් වෙන්න බලන්නෙත් නෑ. ඒ පාර අනික් පාටිශන් එකට ඉස්සර දුවපු ලිනක්ස් මින්ට් වෙනුවට ෆෙඩෝරා අලුත්ම වර්ශන් එක දැම්මා. කිසි අවුලක් නෑ. ලැප අලුත්ම එකක් වගේ සුපිරියට වැඩ. ඉතිං ඔන්න ඔහොම තමයි ඩොලර් 1000 වියදම් වෙන්න තිබ්බ වැඩේ ඩොලර්  98න් ඉවර කර ගත්තේ.

මම කියවපු ඉන්ටර්නෙට් ෆෝරම් වල තිබ්බ විදිහට SSD හාඩ් එකකට කොම්පියුටරේ එදිනෙදා වැඩ වල වේගය හයගුනයක් දක්වා වැඩි කරන්න හැකියාවක් තියනවා. ඉතින් කැමතිනම් මේ ක්‍රමය අත්හදා බලන්න.  අලුත් කොම්පියුටරේකට යන සල්ලි ටික ඉතිරි කරගන්න ඕනි නම්.

මම සහ ලැප් රාජයා ප්‍රසන්ටේශන් එක ඇරඹීමට මොහොතකට පෙර
Tags:

ඒ ලෙවල් උනුසුම රට පුරාම පැතිරිලා තියෙන මේ මොහොත හෙවත් තැටිය හොදින් රත් වෙලා තියන වෙලේ රොටියක් පුච්චගන්න මටත් හිතුනා. මම සාමාන්‍ය පෙල ලියලා ප්‍රතිඵල එන්නත් කලින්ම තමයි උසස් පෙල ජීව විද්‍යාව කරනවා කියලා තීරනය කලේ. හැබැයි ඒක් ලේසි තීරනයක් උනේ නෑ. මොකද විද්‍යා විශයන් වලින් මම ගොඩක්ම ඉගෙනගන්න ආසා කරපු පරිගණක අ0ශය, තාරකා විද්‍යාව, ඉලෙක්ට්‍රොනික්, භොතික විද්‍යාව වගේ දේවල් හදාරන්න වඩාත් සුදුසු උනේ ගණිත අ0ශය. නමුත් මම ගණිතයට ගොඩක් දක්ශයෙක් උනේ නෑ විතරක් නෙවෙයි, ගණිතයට ගොඩක් දුර්වල ලමයින්ට වෙන්වුන පන්තියේත් හිටපු නිසා උසස් පෙල ගණිතය අසමත් වෙයි කියන බය හිතේ හොල්මන් කරා. (ප්‍රතිඵල ආවම ගණිතයට A සමාර්ථයක් නම් ආවා) ඒ නිසා වැඩි කැමැත්තක් නැතුව හරි ජීව විද්‍යා විශයන් තෝර ගත්තා.

මේ වෙනකොට අපේ අක්කාත් උසස් පෙල ජීව විද්‍යාවට තුන් පාරක්ම ලියලයි තිබුනේ.ඒ නිසා අක්කා නොගිය උසස් පෙල උපකාරක පන්තියක් මුලු නුවරටම තිබ්බේ නෑ. හැබැයි ඒ නිසා අක්කා මට දුන්න උපදෙස් අනුව විශයන් තුනට ගියේ අමතර පන්ති තුනකට විතරයි. ඒකට පින් සිද්ද වෙන්න සෑහෙන වෙලාවක් ඉතිරි උනා මට පාඩම් කරන්න. හැබැයි ඒත් ලේසි නෑ වැඩේ. ඒ නිසා පොඩි කාලසටහන් ක්‍රමයක් මමම හදා ගත්තා 6H කියලා. 6H කියන්නේ පැය 6 කියන තේරුමයි. මට තේරුනා ඉස්කෝලේ යන එකයි පන්ති යන එකයි දෙකම කරගත්තත් මට උපරිමව දවසකට වැඩ කරන්න පුලුවන් පැය හයක් විතරයි කියන එක. ඊටත් පස්සේ පැය හය තව පැය දෙකේ කෑලි තුනකට කැඩුවා විශයන් තුනට හරියන්න. දැන් එක විශයකට පැය දෙකක් තියනවා දවසකට. ඊට පස්සේ ඒ පැය දෙකත් තව පැයේ කෑලි දෙකකට කැඩුවා. එක පැයක් පාඩම් කරන්න. අනික් පැය පහුගිය ප්‍රශ්න පත්තර වලට උත්තර ලියන්න. ඔය විදිහට දිගටම පාඩම් කලා. විභාගේ ගොඩක් කිට්ටු වෙනකොට වැඩි දෙයක් පාඩම් කරන්නට ඉතිරි උනේ නැති නිසා පැය දෙකම පේපර් වලට උත්තර ලියපු එක තමයි කරේ. විභාගේ කටේ තියනකොට ඉස්කෝලේ නිවාඩු නිසා කාලසටහන 9H දක්වා වැඩි උනා. හැබැයි ඒ වෙනකොට එකදාස් නවසිය අසූ ගනන් වල ඉදන් පාස් පේපර්ස් ඔක්කොම දෙතුන් වතාවක් ටයිමින් තියලා ලියලා ඉවරයි.

ඔන්න ඔහොම තමයි මම 94% විතර ඉස්කෝලේ පැමිනීමේ ප්‍රතිශයක් තියාගෙන, පන්තිත් ගිහින්, පාඩමුත් කර ගත්තේ. ඉස්කෝලේ දිගටම ගිය එකේ ලොකුම වාසිය උනේ ප්‍රැක්ටිකල් ඔක්කොම වගේ කරගන්න පුලුවන් වෙච්ච එක. සමහර දවස් වලට ඉස්කෝලේ පන්තියේ ඉන්නේ නැතුව ලැබ් එකේ ම තමයි පාඩම් කරෙත්. අන්තිමේ ප්‍රතිඵල ආවම රෑන්ක් එකක් එක්ක A 3ක් නම් තිබ්බේ නෑ. ඒත් එක පාරින්ම කැම්පස් යන්න නම් ඒ උත්සාහේ ප්‍රමානවත් උනා.

ජනිත් තම පාසල් රසායන විද්‍යාගාරයේ මූත්‍රා පරික්ශාවක යෙදෙමින්
Follow ජනිත් ගේ විකාර කතා . on WordPress.com

ඔක්කොම කථා

%d bloggers like this: