මගේ කියන්න පුළුවන් විකාර අත්දැකීම්

Posts tagged ‘විකාර කතා’

සුරාවේ අගේ..

දිනය: 07/03/2013

වෙලාව: රාත්‍රී 7.30

ස්ථානය: මධ්‍යම බස් නැවතුම්පල පිටකොටුව

මහනුවර බසයේ වැඩි සෙනගක් නැත. මට අසුනක් ඉදිරියෙන් තිබුන හිස් ආසනයට අයකු ගොඩවූයේ පියවි සිහියෙන් නොවේ. මිනිත්තු කීපයක් තුල පොරගේ කන සාක්කුවේය. ටික වෙලාවකින් හොඳ සිහියෙන් සිටි බුවෙක් ද එම අසුනේ හිඳගත්තේය. දැන් බීගත් බුවා (අපි BB යයි හඳුන්වමු) වෙරි පිටම අනිකා ගේ කරට හේත්තු වෙයි. නැවත ජනේලෙට හේත්තු වෙයි. ඔය අතර කොන්දයියා එයි. එයි ටිකට් ටිකට්.. ඔහු කීපවරක්‌ විමසුවද BB ගෙන් ප්‍රතිචාරයක් නැත. මොකද්ද කීවද එය නොතේරෙයි. කොන්දා බලෙන්ම මුදල් ගෙන නුවරටම ටිකට් එකක් ලබා දෙයි (අමතරව කනේ පාරක් ද බෝනස් ලෙස දුන්නේ BB ගේ අසල්වැසි මගියා විසිනි).

Man-drinking-alcohol

වෙලාව: රාත්‍රී 11.15

ස්ථානය: බස් නැවතුම්පල කඩුගන්නාව

BB ගේ අසල්වැසියා මාවනැල්ලෙන් බැස ගොස් ය. එමනිසා මුළු අසුනේම ඔහු දිගා වී සිටින්නේ ඔලුව බිමට හිටින සේ ය. කඩුගන්නාවෙන් බසයට නගින තව බුවෙක් ඇති තරම් හිස් සීට් තිබුනද BB අසලට විත් ඔහු කෙලින් කර එතන හිඳ ගනී.

මල්ලී ඔයා කොහෙටද යන්නේ?”

ඔහු විමසයි. මේ වනවිට ශරීරගත මද්‍යසාර සාන්ද්‍රණය තරමක් දුරට අක්මාවෙන් විෂහරණයට ලක්ව ඇති සේය.

එගොඩඋයන ට” කියන ඔහු නැවත කන සාක්කුවට දා ගනී.

බලන්න මල්ලී පවු නේද?

අලුත් බුවා අපට බණ ටෝක් එකක් දී BB තම උරහිසට වත්තම් කර ගනී. මගේ පපුව හෝස් ගා ඇවිලෙයි. ශා මෙහෙමත් කරුණාවන්ත අයියලා මේ රටේ කොච්චර ටික දෙනෙක් ද ඉන්නේ. මගේ චින්තන ධාරාවට බාධා ඇති වන්නේ මට ඉදිරිපස අසුනේ සිටි කෙනා ගේ කෑ ගැහිල්ලෙනි.

“අඩෝ.. මොකද තමුසේ ඔය බීපු එකාගේ සාක්කුවට අත දාන්නේ?”

අලුත් බුවා හොල්මන් වෙයි. කොන්දය්යා ට යකා නගී. “තමුසේ වෙන තැනක ගිහින් වාඩි වෙනවාද නැත්තම් පොලීසියට අල්ලලා දෙන්නද?”

මම හොරෙක් නෙවෙයි. මේ මනුස්සයා පවු. මමත් බස් ඩ්‍රයිවර් කෙනෙක්.

මට තමුසේ කවුරු උනත් කමක් නෑ ඔයි . මේක මගේ බස් එක. ඒ මිනිහා නුවරට ටිකට් අරන් ඉන්නේ.

කොන්දා ගේ එම ටෝක් එකට අලුත් බුවා ශේප් එකේ වෙන තැනක හිඳ ගනී. ඔයින් මෙයින් බසය නුවරටම ඇවිත් ය. මම බැස ගත්තෙමි. ඒ වන විට වෙලාව රාත්‍රී 11.40 ය. දැන් එය සිදුවී පැය 24 වඩා ගතවී ඇත. මේ වන විට BB නැවත සුව සේ එගොඩඋයනට පියවි සිහියෙන් නැවත ලඟා වී ඇතැයි මම සිතමි.

alcohol_cartoon

පසු වදන (බුදු වදනිනි)

උපුටා ගැනීම  ආගිය කතා බ්ලොගියෙනි .

උම්මත්තා විගත ලජ්ජගුණා භවන්ති

දීනා සදා ව්‍යසන රෝග පරායනා ච

ජාතා භවේසු විවිධෙසු විරූපදෙහා

පීත්වා හලාහලවිසංව සුරා විපඤ්ඤා

නුවණ නැති තැනැත්තා කෑ සැටියේ මැරෙන විෂක් බඳු වූ සුරාව පානය කොට අනාගතයෙහි උන්මත්තක වන්නාහ. ලැජ්ජා ගුණය නැත්තෝ වන්නාහ. දිළින්දෝ වන්නාහ. සෑම කල්හිම නොයෙක් ව්‍යසන හා නොයෙක් රෝග ඇත්තෝ වන්නාහ. නොයෙක් ජාතිවල උපන්නාහු විරූප ශරීර ඇත්තෝ වන්නාහ

ජනිත්ට එලොවින් ආ ලියුම

එලොව ගිහින් මෙලොව ආවා මහාචාර්ය එදිරිවීර සරත්චන්ද්‍ර ගේ වේදිකා නාට්‍යකි. එලොව සිට පැමිණියා යයි කියන හිඟන්නකු කළු හාමි නම් මෝඩ ගැමියකු රවටා ඔහුගේ මුදල් අබරණ මෙන්ම අශ්වයාද රැගෙන පලා යාම මෙහි කතා සාරය ලෙස දැක්විය හැක. මෙන්න එහි කොටසක් මතකය අලුත් කර ගන්නට.

මහාචාර්ය සරත්චන්ද්‍ර

මහාචාර්ය සරත්චන්ද්‍රයන්

රි‍දී‍ ර‍ත්‍ත‍ර‍න්‍ ඇ‍ඳ‍ගෙ‍න හැට්ට රෙද්ද උජාරුවට අස්සය පිට නැග යනකොට දකින දකින අය කියාවි ආං යනව ‘කළුහාමිගෙ දූ’යි කියල ‘කළුඅප්පුගෙ දූ’යි කියල කනකර බඩු දුන්නෙ කවුද ‘කළුහාමියි දුන්නෙ ඒව’ සුදු අස්වය දුන්නෙ කවුද ‘කළුඅප්පුයි දුන්නෙ ඌව’ අම්ම දුන්න කනකර බඩු අප්ප දුන්න සුදු අස්වය රි‍දී‍ ර‍ත්‍ත‍ර‍න්‍ ඇ‍ඳ‍ගෙ‍න හැට්ට රෙද්ද උජාරුවට අස්සය පිට නැග යනකොට දකින දකින අය කියාවි ආං යනව ‘කළුහාමිගෙ දූ’යි කියල ‘කළුඅප්පුගෙ දූ’යි කියල…

මෙන්න මෑන්

මෙන්න මෑන්

මෙබඳු හිඟන්නන් මෙන්ම කළු හාමිලා ද අදටත් අඩුවක් නොමැතිව සොයා ගත හැකිය. පසුගිය දිනක 138 බසයේ  යමින් සිටියදී ජනිත් ගේ අතටද එලොවින් ආ ලියමනක් ලැබුණි. මේ එම ලියමනයි. (අකුරු අපැහැදිලි නම් රුපය මත ක්ලික් කරන්න)

හිඟන්නා ගේ පියා පරලොව සිට එවූ ලිපිය

හිඟන්නා ගේ පියා පරලොව සිට එවූ ලිපිය

බලන්න පවුලේ අසරණ භාවය ගැන එලොව සිටින පියා දන්වා ඒවා ඇති අපූරුව. කළු හාමී වේදිකාව මත රැවටෙන රැවටීමම, ජීවන රංගභූමිය මත සිදුවෙන විට එය වටහා ගැනීමට තරම් විචාර බුද්ධිය අපේ පොදු ජනතාවට පහල වේවා යන්න මගේ පැතුමයි.

බස් එකේ අතවරය (17+ )

බස් වල සිද්ද වෙන කාන්තා හිංසනය කියන්නේ බ්ලොග් අවකාශේ වගේම අනික් තැන් වලත් කතා වෙන බොහොම ප්‍රසිද්ධ මාතෘකාවක් නේ. මේ කියන්න යන්නේ ඊට වඩා ටිකක් විතර වෙනස් කතාවක්.

මේ සිද්දිය සිද්ද උනේ ගිය අවුරුද්දේ මම කැම්පස් ඉඳං ගෙදර එන දවසක. මම සාමාන්යෙන් මාතර ඉඳං මහනුවරට එන්න පිටත් වෙන්නේ රැ ජාමේ. ඒකාලේ දැන් වගේ හයිවේ තිබුනේ නෑ නේ. දවල් ට්‍රැෆික් එකත් එක්ක ගමන පිටත් උනොත් මුළු දවසම යනවා. ආසන්න විදිහට පැය නවයක්  හෝ ඊට වඩා (නෝමල් බස් එකේ හරිද. ඉන්ටර්සිටියේ ගිහින් කොහොමද  මහපොලෙන් ජීවිතේ ගැට ගහගන්නේ..D) . හැබැයි රැ පිටත් උනොත් පැය හයකින් විතර එන්න පුළුවන්. නුවර මාතර කෙලින්ම යන්න පුළුවන් බස් දෙකයි තියෙන්නේ. එකක් තමයි මාතර මාතලේ බස් එක . අනික තමයි මහනුවර වලස්මුල්ල බස් එක.

MTC_6342 Sri Lanka

අදාල දිනේ මම මාතර ඉඳං ආවේ මාතර මාතලේ බස් එකේ. ඒක සෙමි ලක්සරි බස් එකක්. ඕක මාතර ස්ටෑන්ඩ් එකෙන් පිටත් වෙන්නේ හවස හතයි කාලට විතර. මම ඉඳගෙන හිටියේ බස් එකේ පිටිපස්සේ සීට් එකේ ජනේලේ ළඟ. (පෙම් මුල්ල කියන්නේ එතනට නේද? )  සාමාන්‍යයෙන් මේ බස් එක කොළඹට එනකන් ලෝඩ් වෙන්නේ නෑ. ඉතින් ගාල්ලට එනකන් පිටිපස්සේ සීට් එකේ හිටියේ මමත් එක්ක තව එක්කෙනෙක් විතරයි. ගාල්ල පහුවෙලා බුස්ස කඳවුර ලඟින් ඔන්න ආමි පෙනුමක් තිබුණ හාදයෙක් බස් එකට නැග්ගා. ආමි පෙනුමක් කියලා මම කිව්වේ කොන්ඩේ කොටටම කපලා ලොකු ට්‍රැවලින් බැග් එකක් පිටේ එල්ලං හිටි නිසා. එයා ඉඳගත්තේ මං ලගින්.

හෝල්ට් දෙකක් යන්න ලැබුනේ නෑ මිනිහා කුම්භකර්ණයා වගේ නිදි. මේ වෙනකොට බස් එකේ වේගේ සීය පන්නලා තිබුනේ. හුලං පාර දරන්න අමාරු නිසා මම ජනේලේ වැහුවා. ඔන්න එක පාරට බස් එක ලොකු බ්රේක් පාරක් ගැහුවා. එත් එක්කම ආමි අය්යා ඉස්සරහට විසි වෙලා පිටිපස්සේ දොරයි සීට් එකයි අතර තියන තහඩුවේ “ඩොන් “ ගාල ඔලුව වද්දා ගත්තා. මිනිහගේ නිදිමත කොච්චරද කියනවා නම් ඒක පොඩ්ඩක් වත් ගානක් නැහැ. අයෙත් හරි බරි ගැහිලා නිදි. සමහර විට නයිට් ඩියුටි ඉඳලා වෙන්න ඇති එන්නේ.

SANYO DIGITAL CAMERA

ඔන්න බලපිටිය හරියෙන් තව කෙනෙක් බස් එකට නැග්ගා. වයස පනහ පැනපු සුදු සරමයි ෂර්ට් එකයි ඇඳ ගත්ත ඇඳුම පුරා බුලත් කෙල කහට බැඳිච්ච අපිරිසුදු ඩයල් එකක්. මිනිහත් ආවේ පස්සේ සීට් එකට. එයා ආමි අය්යට එහා පැත්තෙන් ඉඳ ගත්තා.

ඔන්න ටික වෙලාවකින් එයත් නිදි කිරන්න පටන් ගත්තා. හැබැයි මිනිහා නිදි කිර කිර ටිකෙන්  ටික ආමි අය්යා පැත්තට බර වෙනවා. ඕකත් සාමාන්‍ය දෙයක් නිසා මම වැඩිය ගණන් ගත්තේ නෑ. මෙන්න බොලේ ඊට පස්සේ මෑන් ඒක අතක් ආමි අය්යාගේ කරට දාල අනිත් අත ටික ටික උකුල පැත්තට ගෙනියනවා. ඔය අතරේ මම ෆුල් හොල්මන් වෙලා මොකද යකෝ මේ වෙන්නේ කියලා. ආමි අයියා වැඩේට මුකුත් අකමැත්තක් නැහැ කියලා හිතපු මෑන් ඔන්න ඒ පාර අය්යා ගේ අහවල් හරියට මසාජ් පාරක් දෙන්න පටන් ගත්තා. තද නින්දේ ඉන්න ආමි අය්යත් පොඩි සද්දයක් දාල සප් එක දෙනවා . මේ මොකද්ද මේ වෙන්නේ? එක්කෝ මේ යකාත් අරූ ගේ ටයිප් එකේම එකෙක්. එහෙම නැත්නම් අර ඩෙස්මන්ඩ් මොරිස් අන්කල් කිව්වා වගේ එයාට නිල් හීනයක්‌ වත් පෙනුනා වෙන්න ඇති.

1211998271-unavngivet1

තවදුරටත් මේක බල බලා ඉඳලා හරි යන්නෑ. එත් මම මොනවා කරන්නද? හරි ආවා අයිඩියා එකක්. මෙච්චර වෙලා වහලා තිබුණා ජනේලේ මම ෆුල් ඇරියා. බස් ඒක සීය පන්නලා යන නිසා එකපාරටම හුලං පාර ආවා නිකං සැන්ඩි කුණාටුව ගැහුවා වගේ. හුලං පාර වැදුනා විතරයි ආමි අයියා දඩි බිඩි ගාල ඇහැරුනා. ඔය අතරේ අර මැන් දෑත බදලා ගේම දෙනවා. ආමි අය්යට සිහි එලව ගන්න තප්පර දෙක තුනක් යන්න ඇති. ඒක පාරටම ආමි අය්යා නැගිටලා අරූ ගේ බෙල්ලෙන් අල්ලලා තල්ලු කරලා දැම්මා නිකං ජෝන් සීනා ගේ ලොකු අය්යා වගේ. මිනිහා සීට් දෙක තුනක් පහු කරලා වීසි වෙලා ගිහින් බිම වැටුනා. ඊට පස්සේ අමාරුවෙන් නැගිටලා පොඩි හිනාවක් දාලා බසේ එකේ ඉස්සරහට ගියා. සිද්දිය දිහා රබර් ඇහැ දාල බලාගෙන හිටපු මම ඉක්මනට ජනේලෙන් එලිය බලා ගත්තා. ආමි අය්යා වටපිට බලලා සිද්දිය කව්රුත් දැක්කේ නැහැ කියලා හිතාගෙන ආයෙත් ගොරව ගොරව නිදා ගත්තා.

මට හිතුනේ එක දෙයයි. සමාජේ එක එක ජාතියේ මිනිස්සු ජීවත් වෙනවා. ඒ අතරේ ඉන්න කොට තමන් පිරිමියෙක් උනත් කාන්තාවක් උනත් ටිකක් පරිස්සමින් ජීවත් වෙන එක නුවනට හුරුයි.

%d bloggers like this: